【商業熱話】叙福樓暫停旗下「3.5」間分店營運

商業熱話

叙福樓(1978)主席兼行政總裁黃傑龍,今日(9日)在社交媒體上宣佈,會暫停營業3間旗下餐廳,分別是:

一)沙田新城市的柳氏家;

二)旺角瓊華中心的MMC牛涮鍋;

三)銅鑼灣世貿的MMC牛涮鍋。

同時擱置已收鋪但未裝修的永華麵家。

主席這樣解釋結業原因:「三間分店一向生意都只屬一般,過去呢幾個月亦係處於社會運動的核心區,踏入10月只有正常生意的10-20%,能夠頂到今天已經係同事最大的努力,奈何實在係虧損得太嚴重了。停業唔可以怪任何人,只係我管理不佳。中美貿易戰嚴重困擾本地經濟,港鐵經常突然提早關站,都明顯加速了問題的浮現。社會運動帶來的社會成本,我作為香港人當然願意一同承擔。」

主席表示一個員工不裁,同時懇請業主減租:「生意人做到要關門從來都係最困難嘅決定,但係面對着完全不明朗的處境,再困難的決定只要正確,都要馬上落實。 三間鋪我堅持一個同事都唔裁減,全部同事只要願意都會繼續被聘請調去其他店舖。

我會繼續懇請同哀求各大業主高抬貴手願意減租,6月至今暫時只有兩個舖業主同意減租,雖然減幅是很少(幫助極微)但係我內心都好感激佢哋,因為只講合約精神的話其實佢係一毫子都唔需要減嘅。」

主席最後更表示:「我會繼續擔任公司CEO,直至同事與顧客對我嘅支持率跌破50分,絕對不會等到低過20分。懇請大家繼續指正教導🙏 , 肯定我們將來會更加強壯, 只要今次唔死😅。

今天香港整個零售餐飲業都經營極度困難,所以唔係單單我面對這個困境,大家唔需要特別嚟支持我,去都去咗小店先💪。」

另外,有飲食業界代表今日(9日)出席電台節目時表示,估計目前已有逾100間食肆倒閉,有2,000人受影響,倒閉的食肆亦沒有人願意接手,希望政府可全豁免上年度利得稅。香港零售管理協會主席謝邱安儀指,有街舖業主願意減租10%至30%與租客共度時艱,但大部分商場,以及地鐵商戶和領展仍未有減租或推出紓困措施的意向。

消息來源:黃傑龍Facebook專頁、商台

你可能感興趣

loading