【創業故事】理想需否兼顧成本?-Lilian Kan

商業熱話

Lilian(簡幗儀)自幼的理想是做一個時裝設計師,她並非來自一個富有家庭,之後創業都是拿自己兼職當模特兒賺來的20萬元去做創業本金。20萬對很多人來說很少,但對當時的Lilian來說已經很多了。擁有這筆錢,Lilian終於可以開始實現自己當時裝設計師的理想。然而,這也開始了她的「撞板」之路。

20萬本金的背水一戰

以Lilian在網絡世界的名氣,做一個模特兒或KOL應該也有豐厚的收入,為什麼要選擇創業呢?Lilian回答:「我好細個已經開始想做時裝設計。細個娛樂好少,唔俾玩,但我好鍾意畫畫,畫完美少女戰士,會轉做另一件衫。當時仲未知咩叫時裝設計,慢慢大,就知道自己鍾意做呢樣嘢。當時屋企有好多布同衫,我會拎嚟玩,拎啲布嚟剪。」Lilian表示,她在小學紀念冊上填自己的理想,就是填「時裝設計師」。她喜歡有自主性的工作,可以自由創作。

那模特兒呢?Lilian說:「做model壽命比較短,外貌最有市場係十幾廿歲。做演員可以prolong,但我唔係做演員。如果唔趁早創業,之係先起步就會太遲。」不過,Lilian很慶幸自己的模特兒工作,為她帶來了創業本金。Lilian讀碩士(時裝及紡織系)的時候開始做模特兒,畢業後,打了一年半的工,所有的年假都拿來做模特兒的工作,有一次更成功為一個電子繪圖板代言。

然後,她戶口終於儲到20萬,開始創業,租地方,裝修,做collection。Lilian自言當時是「大膽倉卒」,她租了一個3萬元的中環office,幾乎連頭幾個月的租金都不足夠。「第一個月賺到之後幾個月營運嘅錢,冇investor,冇其他儲蓄。頭幾年捱得好辛苦,表面上我好似好冇壓力好開心,但其實果段時間好辛苦。唔可以同人講,冇人幫到我。而且我冇家底。做咗幾年之後,慢慢穩定。」

創業期間的挫折

在Lilian的創業路上,最大的困難可說是租金和成本控制。Lilian搬了三次office。第一次搬是因為地方不夠用,租了荃灣一個office,地方大了反而更便宜,於是進一步開展攝影業務。這次用了很多錢裝修,誰知一年之後,業主說要收回自用,結果裝修的錢都浪費了......

於是第二次搬office,又蝕了很多錢,Lilian說:「好辛酸,當時開始賺到少少錢,但所有錢都拎哂去搬office。」但沒有辦法,被人迫遷惟有搬。Lilian自言,當時做錯了很多business決定,以為搬了office就可以賺到足夠多的錢,未有做好成本控制。「租金突然間double咗,地方大咗,裝修錢又再貴咗,呢次搬係個好差嘅決定。其實應該搵個差唔多,甚至cut咗個影相服務係仲好。」

結果第三次搬office,就真的放棄攝影業務了,專心做回時裝設計。Lilian自言:「我自己唔係攝影師,但又要出糧俾攝影師,結果好似幫攝影師打工。又幫業主、化妝師打工。」這一次搬完之後,就開始穩定了,「有少少收成」,好多人會認得自己的衫。但Lilian說現在還是起步階段,而之前那五年可說只是準備期,反觀很多人第五年已經「有聲有色」了。

置諸死地而後生

有後悔嗎?Lilian坦言,即使經歷了這麼多挫折,還是覺得如果沒有創業,才會令自己後悔。「我冇其他選擇,一心一意。你唔做呢樣嘢就冇嘢做。潛能喺無錢嘅時候會激發得幾好。如果我有無限金錢、冇撞過板,我係唔識做決定。就算幾辛苦,你唔放棄,係會持續賺到錢。」

在不斷的跌跌碰碰中,Lilian學到單有熱情不足夠,還要考慮很多現實問題:「做設計師同老闆係兩樣嘢,設計師要靚,老闆要壓成本同翻本。做設計師會不惜一切整一件靚嘅衫。老闆會諗,賣到咁貴,有冇人買?」她經常去尋找一些更便宜的方法,去做到好靚的效果。

這些歷練,也令她更喜愛自己的工作:「完全冇諗過停止設計工作。如果全職做model或者KOL,工作同壓力都少好多。但係我真正熱愛我做緊嘅嘢。我諗住唔退休,做到死。我希望就嚟死之前,當時仲自己做緊熱愛嘅嘢。」Lilian指,自己希望未來能打造一個「時裝王國」,不是只做自己的牌子,而是做一個更大的網店,比如是開設男裝的產品線。

美麗易逝,但歷練更為恒久。

受訪/照片: Lilian Kan 簡幗儀
訪問/文章: Business Digest

你可能感興趣

loading