【時間管理】意識到自己的拖延症,但無從入手? 教你價值20萬的時間管理法 

商業智慧
教你價值20萬的時間管理法 

*此為授權轉載文章,作者為Private Portfolio*

上一集同大家提過,生活上浪費左嘅時間,今集就分享2個書入面嘅法則,希望可以幫助到大家改善下時間管理,提升工作效率!

15分鐘法則:完美解決你嘅拖延症

好多人都已經意識到時間嘅重要性,亦都試過好多唔同嘅時間管理方法同工具,但係都無效,最後都係輸俾拖延症。雖然都明白問題所在,但就係冇方法即時進入工作狀態,總是將一件事拖到最後先開始,開始會做一啲無關重要嘅嘢,例如睇下新聞,睇下同工作無關嘅網站,仲會自我安慰「開工前十分鐘,讓自己放鬆下先至能夠集中工作」。如果你都係呢一類型並且都想做好時間管理,書入面有一個咁嘅方法或者啱你。

我哋可以試下按住下面嘅步驟嚟做:

1.明確自己要做嘅正經事。
2.將所有嘅干擾因素都排除,令佢哋至少喺十五分鐘內唔會騷擾到你。
3.嘗試將注意力放到要做嘅正經事上面並且堅持15分鐘。
4.十五分鐘之後,睇下自己仲能唔能夠堅持,如果可以咁就繼續做,如果唔得就放棄或者做其他嘢。

按照呢個方法實施咗15分鐘之後你會發現,原本冇動力做嘅嘢,而家都變得好樂意去完成咗佢。就好似睇一本書咁,原本冇興趣,但偶然睇到有意思嘅段落,就會有想一口氣睇曬成本書嘅衝動。

點解呢個方法有效呢?

首先,呢個時間長度好合理,對於拖延症患者嚟講,十五分鐘唔會有壓力,堅持一陣就可以過去啦。

其次,排除咗干擾,令到人更加專注,習慣拖延嘅人往往係最容易受到外來因素騷擾,去除呢啲騷擾後,你嘅心思、精神先至會放喺正經事上面。

最後,因為比較靈活自由度高,十五分鐘過後,可以自由選擇,如果狀態好繼續做,如果狀態唔好咁就放鬆一下自己,不過前題係15分鐘必須要係沉浸式,高效的。

15分鐘法則:完美解決你嘅拖延症

六點優先原則:價值2.5萬美元嘅時間管理法

我哋每人要處理嘅事情好多,隨時會響起電話,數唔曬嘅臨時會議,推唔甩嘅社交活動,每一個突發嘅情況都會令人要放低手頭上嘅工作去面對,於是乎不知不覺間成為咗即場入面嘅「消防員」,邊度有需要就要過去邊度「救火」。

咁樣嘅人通常都有一個壞習慣,就係分唔清楚事情嘅「輕重緩急」。任何事總會殺到埋身先至會動手處理,結果將自己搞到疲備不堪,仲要無效率,如果你係咁樣嘅人不妨試試,六點優先原則。

六點優先原則最早由美國嘅效率專家提出。曾經有一間公司向專家求助,因為依間公司已經面臨破產,希望專家出謀獻策,拯救公司。專家了解公司情況後,專家只是攞出一張紙,叫總裁講聽日要做嘅事寫低,總裁就將要做嘅事同平常常規要做嘅事一一寫喺紙上面。專家再叫總裁選擇佢認為最重要嘅事,然後跟重要程度排序,總裁只係用咗幾分鐘就揀咗六件事並排好次序。

專家就同總裁講呢個係我畀你嘅方法,從明天起先全力以赴完成第一件事,然後第二件事,如此類推,直到將六件事情都完成。堅持一段時間之後,如果你覺得有成效,可以推行至高層管理人員,如果依然有效,可以繼續向下推行,直到你公司每一位員工都用呢個方法。

總裁接受專家提議,將呢個方法付諸實行,呢間公司嘅經營情況逐步好轉,五年後呢間由瀕臨破產嘅公司轉變成為一間,美國最大嘅私營企業之一。

後來專家收到由公司總裁寄嘅2.5萬美元支票作為酬勞,依一套時間管理方法就被稱之為「價值2.5萬的時間管理方法」,其核心就係「六點優先」原則。

編輯/製圖:Business Digest

你可能感興趣

Facebook.png
IG.png