回憶返自己做HR嘅時間，大約9年間，Interview嘅工作佔得最大部份，見過嘅Candidates都有好多唔同類型，自今有兩種Candidates仍然係對我最難忘。

1）自信心滿瀉型

最記得有一次見個Candidate，好似只係問咗2至3條問題，之後全程都係對方講嘢，好似Talk Show咁，講到自己過去經驗點樣符合今次申請職位，亦都不斷只係講威水史，最重要係唔請我係貴公司走寶，又可以隨時返工，一埋位即刻做到嘢，仲有好似知道晒我要問嘅問題（當然唔係），最後都唔係好記得點完個interview，重點係當然無請，因為我想了解佢嘅機會都無，嗰一次面試完全無交流，純粹聽佢晒冷咁。

2）神級演技型

有一次幫公司請一個Customer Service role，面試見到一個接近完美嘅Candidate，態度溫柔，聲線柔和，坐得端莊，談吐得宜，唔識答嘅問題會講唔好意思，會主動分享過往做得唔好嘅顧客服務例子，心諗有無搞錯竟然有咁好嘅Candidate出現。

難得一見嘅Candidate，當然唔會錯過，所以同日立刻交俾Head Of CS見一見，結果都係一樣，實在太好，好到唔相信，但最後決定請佢。

點知，返咗第一日（未到Lunch）已經俾同事投訴話佢好無禮貌同埋大支嘢，呼喝啲同事，了解後佢承認面試嗰陣做足功課知道公司好著重Customer Service所以點解會有咁嘅Performance，但換來即日送佢走，Lose Lose雙輸。

面試係一個讓大家互相認識嘅平台，而唔係要講贏對方嘅擂台。

搵工係搵到一份適合嘅自己工作，而唔係為搵而搵之後做一份你唔鍾意嘅工作。面試最重要嘅還係展現真實嘅自己，對你，對公司，都好。

作者：HR熱血男

編輯/製圖：Business Digest