【職場之道】如何塑造個人品牌，個人形象即係品牌營銷？
產品需要有包裝設計，同樣嘅理念點解唔可以放係我哋嘅個人包裝上？高度溝通能力有助職場上提高競爭力，生活上減少磨擦。
好多時候我會遇到 candidate 或者係新相識嘅朋友講完一長篇自我介紹之後，我都唔太清楚佢想點樣 position 自己嘅定位。
其中一個原因係缺乏架構及組織重點，再以一個既定人設/角色用講故事嘅方法去傳達。
喺人際關係學上、人類對於聆聽時侯集中力只有頭三十秒和最後三十秒。因此能夠用好精簡嘅方法，表達自己嘅特徵同埋個性非常重要。我有一個推薦方法，大家可以嘗試一下：
- 試想想或者直接問你身邊三個關係最好嘅朋友，綜合一下佢哋俾你嘅形容詞。由於人類喺唔同關係上飾演嘅角色都唔同，我會建議諮詢朋友以外自己嘅親人同埋上司或者下屬。結合大家嘅意見，我會圍繞個結果嚟介紹自己嘅人生故事。
- 我會避免以個人成功嚟介紹自己，畢竟謙遜係一種美德。
- 如果你人生路上遇過任何一個大嘅波浪、困境，我哋可以用一個好正面嘅方法去表達，而且用一個從容嘅心態去講解你嘅經歷。咁樣可以傳達一個好正面嘅訊息。
- 最後可以加上自己嘅興趣，因為一個人嘅興趣都可以幫助別人直接了解你，喺某個程度上興趣係可以反映一個人嘅價值觀。
以下我想分享一下鍛鍊溝通能力嘅方法，大致會有以下嘅範疇
- 學會傾聽
- 接受多樣化人性
- 注意自己的言詞
- 不要批評別人
- 先聆聽後分享
溝通從來都是雙向的，有好多時候好多朋友犯咗一個好基本嘅錯誤，就係拒絕傾聽別人，以自我為中心。當別人感覺不到你以相同嘅尊重，去對待佢哋想說嘅話，久而久之就唔想再同你分享任何諗法。
而有些時候，由於我哋對於朋友或者近身嘅人士都希望同我哋有一貫性睇法，所以當大家嘅睇法唔同嘅時候，就忘記咗人類本身就係多元化生物。學會接受唔同嘅觀點亦都非常重要，要明白觀點與角度從來沒有對與錯。
有時候當我哋想表達自己嘅意見，又有冇用到一啲過激嘅言詞嚟反駁呢？言語對人類身心靈嘅影響，並唔會比身體上嘅暴力少。大家可以嘗試吓辯論嘅時候，用3秒或者5秒時間去諗一諗自己想點樣去表達。當大家有一個思考嘅意識，你說話嘅時候就會更加小心一啲，避免用傷害性詞語嚟表達同樣嘅諗法。
綜合嚟講，最好嘅溝通方法會係先聆聽後分享。無論係心靈上還是實質上，讓你嘅對手感覺被尊重，你才會贏得最大嘅回報。
個人品牌營銷方面，除咗自我介紹嘅一環以外，平時嘅溝通方法同埋處事方法都足以讓第三者對你刮目相看，我哋千祈唔好遺忘善待他人呢個咁重要嘅特質。
最後我希望大家都能夠成功實踐個人品牌，建立屬於自己嘅美好人生。
筆者簡介
Diana Yiu（姚曉恩） －
從事 Marketing 超過20年，目前是 Fillture Career Coaching Limited 職涯規劃服務公司合夥人，Mopi 全自動駕駛公司共同創辦人，擅長通過溝通技巧及理解人性專長幫助客人尋找及提升自己長處。