【BD商業策略】購買三文魚時會留意是否挪威產？產地或只是一種給消費者的心理暗示

喺超級巿場售賣嘅兩片三文魚，不論產地、大小、質量、售價都一模一樣，但銷售額就可以差好遠，原因係一片叫「三文魚」，而另一片叫「挪威三文魚」。

好多時marketer除咗利用大量嘅宣傳去幫大家洗腦之外，其實仲會用到好多心理學嘅技倆。例如推出產品/ 服務嘅前中後期會做好多「種草」推廣，喺消費者腦海中植入不同嘅訊息，令推出宣傳時效果更佳。而「挪威」三文魚就利用咗一個較為常用嘅心理學手法，稱「預期效應」。

好多年前有學者進行一項研究，將一班智商及家庭背景差不多小朋友分成兩組，一組稱為「普通學生」，另一組為「資優學生」，由兩位老師分別授課。研究員開始時對負責資優組嘅老師表示，佢嘅學生學習能力較高、較有前途，並強調唔需要對佢哋進行特別嘅培訓，亦唔好俾學生知道自己係資優組，老師只需如常授課。但數月後發現，資優組嘅成績比普通組為高。

其實研究員開始時對老師表示佢哋嘅學生係資優組，已經為老師植入一個對學生嘅期望同標籤。雖然佢哋並冇因為學生係資優組而「直接」改變教學方式，但潛意識會令佢哋心底裡認為資優組學生能力較高，無形間會透過不同方式接間令學生們認為自己較為聰明，再計而影響學生對自己嘅睇法，呢個就係「預期效應」。

大部份消費者心中早已為某種東西給予標籤，潛意識標籤咗「挪威出產嘅三文魚品質較好」，令佢哋最後選擇「挪威三文魚」。除此之外，「預期效應」亦會影響消費者嘅五觀感覺，例如某飲品製造商經常以不同方式建立同植入標籤，希望將產品與不同場景、消費者嘅感受連繫起來，令佢哋遇到某個場景時，就會聯想到該飲品。例如聽到開瓶蓋嘅聲音時，就諗到該飲品係比較解渴、好好味、飲完會得到快樂等等。

當然，有時消費者心中未必一定對產品有任何標籤或期望，所以marketer 會長時間喺消費者心中建立標籤，以不同形式嘅宣傳手法去洗腦同強行建立口碑。口碑好似好難「建立」 ，但其實多年前已經興起嘅「用後感」行銷已經係其中手法之一，其後網上論壇上亦有好多類似嘅接間廣告，而至今就多數由KOL幫品牌種草，以較高質、較大眾易接受嘅內容不停進行植入。

營銷學係一門結合多方面專業嘅學問，除咗大眾平時見到嘅宣傳技巧之外，心理學亦喺當中扮演十分重要嘅角色。亦有人講marketing係一種另類心理學，要揭開當中嘅面紗，先能成為真正精明嘅消費者。

作者：我做Marketing